અખબારી યાદી

શંકરા આઈ ફાઉન્ડેશન મોગરની સુવર્ણ જયંતી ઉજવણી: જગદગુરુ શંકરાચાર્ય સ્વામીજીએ આશીર્વાદ પાઠવી સેવાની સરવાણીને બિરદાવી

આધ્યાત્મિકતા અને આરોગ્ય સેવાનો સંગમ: જગદગુરુ શંકરાચાર્ય સ્વામીજીએ મોગર ખાતે વૃક્ષારોપણ કર્યું અને દર્દીઓની મુલાકાત લીધી

આણંદ જિલ્લાના મોગર સ્થિત શંકરા આઈ હોસ્પિટલના પચાસ વર્ષના સેવાકીય પ્રવાસની ઉજવણીના ભાગરૂપે જગદગુરુ પૂજ્યશ્રી શંકરા વિજયેન્દ્ર સરસ્વતી શંકરાચાર્ય સ્વામીજીએ વિશેષ રૂપે પધારીને સંસ્થા અને જનતાને આશીર્વાદ પાઠવ્યા હતા. આ સુવર્ણ જયંતી મહોત્સવમાં આણંદના સાંસદ મિતેશભાઈ પટેલ પણ વિશેષ અતિથિ તરીકે ઉપસ્થિત રહી કાર્યક્રમની શોભા વધારી હતી. શંકરા આઈ ફાઉન્ડેશન દ્વારા દાયકાઓથી ચાલી આવતી નેત્ર સારવારની પરંપરાને આ પ્રસંગે બિરદાવવામાં આવી હતી.

આ કાર્યક્રમમાં આણંદ સ્થિત શંકરા આઈ હોસ્પિટલના પ્રમુખ ડૉ. મુરલી કૌશિક, મુખ્ય તબીબી અધિકારી ડૉ. નિશા આહુજા અને યુનિટ હેડ કર્નલ સુદીપકુમાર મહેતાએ ઉપસ્થિત સમુદાયને સંબોધિત કર્યા હતા. આ મહાનુભાવોએ સંસ્થા દ્વારા પૂરી પાડવામાં આવતી વ્યાપક સામુદાયિક સેવાઓના વિસ્તાર અને ભવિષ્યના આયોજન વિશે વિગતવાર માહિતી રજૂ કરી હતી. હોસ્પિટલના સંચાલકોએ જણાવ્યું હતું કે સંસ્થાનો મુખ્ય ઉદ્દેશ્ય સમાજના છેવાડાના માનવી સુધી આધુનિક નેત્ર સારવાર પહોંચાડવાનો રહ્યો છે અને આગામી સમયમાં આ સેવાનો વ્યાપ વધુ વિસ્તરશે.

જગદગુરૂ શંકરાચાર્ય સ્વામીજીએ પોતાના આશીર્વચનમાં ગુજરાતના ગરીબ અને જરૂરિયાતમંદ લોકો માટે હોસ્પિટલ દ્વારા કરવામાં આવી રહેલા ઉમદા કાર્યોની મુક્ત કંઠે પ્રશંસા કરી હતી. સ્વામીજીએ આ તકે સ્મરણ કર્યું હતું કે જ્યારે શ્રી નરેન્દ્રભાઈ મોદી ગુજરાતના મુખ્યમંત્રી હતા, ત્યારે તેમણે આણંદમાં ‘શંકરા આઈ હોસ્પિટલ’ની સ્થાપના માટે વિશેષ રસ દાખવી ભગીરથ પ્રયાસો કર્યા હતા. સ્વામીજીએ જણાવ્યું હતું કે સેવાના આ બીજ આજે એક વટવૃક્ષ બનીને હજારો લોકોના જીવનમાં પ્રકાશ પાથરી રહ્યા છે.

સુવર્ણ જયંતીના આ મંગલ અવસરે પૂજ્ય સ્વામીજીએ હોસ્પિટલ પરિસરમાં એક વૃક્ષ વાવીને પર્યાવરણ જતનનો સંદેશ આપ્યો હતો. તેમણે હોસ્પિટલમાં સારવાર લઈ રહેલા દર્દીઓની મુલાકાત લઈ તેઓને ફળોનું વિતરણ કર્યું હતું અને તેમના શીઘ્ર સ્વાસ્થ્યની કામના કરી હતી.

કાર્યક્રમના અંતે સ્વામીજીએ ઉપસ્થિત તમામ ભક્તો અને હોસ્પિટલ પરિવારને પ્રસાદ આપીને આશીર્વાદિત કર્યા હતા. આ પ્રસંગે હોસ્પિટલના સ્ટાફ અને સ્થાનિક અગ્રણીઓ ઉપસ્થિત રહ્યા હતા.