આણંદ જિલ્લામાં  ફળ, ફૂલ અને શાકભાજી પ્રદર્શન-હરીફાઈનું આયોજન

આધુનિક ખેતી થકી આર્થિક સમૃદ્ધિના લક્ષ્ય સાથે ઓક્ટોબર માસમાં યોજાશે પ્રદર્શન; ખેડૂતોને નોંધણી કરાવવા અનુરોધ

આણંદ, મંગળવાર, આણંદ જિલ્લાના ખેડૂતો આધુનિક બાગાયતી ખેતી પદ્ધતિઓ અપનાવે અને નવીન તકનીકોના માધ્યમથી આર્થિક રીતે સદ્ધર બને તેવા શુભ હેતુ સાથે નાયબ બાગાયત નિયામકશ્રીની કચેરી, આણંદ દ્વારા ઓક્ટોબર માસમાં ફળ, ફૂલ અને શાકભાજી પ્રદર્શન તથા હરીફાઈનું આયોજન કરવામાં આવ્યું છે.

બાગાયતી પાકોના ઉત્પાદન અને તેની ગુણવત્તામાં વધારો કરી વધુ આવક મેળવવા ઈચ્છતા જિલ્લાના પ્રગતિશીલ ખેડૂતો માટે આ એક સુવર્ણ તક છે. આ કાર્યક્રમ દ્વારા ખેડૂતોમાં જાગૃતતા લાવવા અને તેમને આધુનિક ખેતીના પ્રવાહમાં જોડવા માટે વિશેષ પ્રયાસો હાથ ધરવામાં આવ્યા છે.

રાજ્યમાં છેલ્લા ત્રણ દાયકા દરમિયાન બાગાયત ક્ષેત્રનો વ્યાપ અને ઉત્પાદન અભૂતપૂર્વ રીતે વધ્યા છે. ગુજરાતમાં બાગાયતી ખેતી હેઠળનો વિસ્તાર ૩૦ વર્ષ પૂર્વે જે ૪.૭૯ લાખ હેક્ટર હતો, તે આજે વધીને ૨૧.૫૯ લાખ હેક્ટર સુધી પહોંચ્યો છે, જે આ ક્ષેત્રમાં થયેલી નોંધપાત્ર પ્રગતિની સાક્ષી પૂરે છે. રાજ્યના ખેડૂતો હવે માત્ર પરંપરાગત ખેતી પૂરતા મર્યાદિત ન રહેતા, આધુનિક પદ્ધતિઓ વડે ઉચ્ચ ગુણવત્તાયુક્ત ફળો, ફૂલો અને શાકભાજીનું ઉત્પાદન કરી રહ્યા છે. આ પેદાશોની વૈશ્વિક બજારમાં નિકાસ કરીને ખેડૂતો પોતાની આવકમાં પણ મોટો વધારો કરી રહ્યા છે.

આણંદ જિલ્લામાં યોજાનાર આ પ્રદર્શન અને હરીફાઈ દ્વારા સ્થાનિક ખેડૂતોને બાગાયતી પાકોની નવીનતમ તકનીકોથી માહિતગાર કરાવવામાં આવશે. આ કાર્યક્રમમાં સહભાગી થવાથી ખેડૂતો અન્ય સફળ ખેડૂતોના અનુભવો અને આધુનિક પદ્ધતિઓ વિશે જાણી શકશે, જે અંતે પાકની ગુણવત્તા અને ઉત્પાદકતા સુધારવામાં મદદરૂપ થશે. જિલ્લાના તમામ ઉત્સાહી ખેડૂતો આ આયોજનનો મહત્તમ લાભ લે તે માટે અપીલ કરવામાં આવી છે.

આ પ્રદર્શન તથા હરીફાઈમાં ભાગ લેવા ઈચ્છતા તમામ ખેડૂત મિત્રો અને લાભાર્થીઓ માટે પૂર્વ-નોંધણી ફરજિયાત છે. નોંધણી કરાવવા અથવા આ અંગેની વધુ વિગતો મેળવવા માટે ખેડૂતોએ નાયબ બાગાયત નિયામકશ્રીની કચેરી, આણંદનો ફોન નંબર ૦૨૬૯૨-૨૬૨૦૨૩ પર સંપર્ક સાધવા જણાવવામાં આવ્યું છે.