બોરસદ તાલુકાના અલારસા ગામે સેવા સેતુ કાર્યક્રમ યોજાયો

Publish Date : 23/09/2026

સેવા સેતુ કાર્યક્રમ અંતર્ગત ગ્રામીણ વિસ્તારની ૧૮૨૬ અરજીઓનો સ્થળ પર જ હકારાત્મક નિકાલ

વહીવટી તંત્રની પારદર્શિતા અને ત્વરિત કામગીરીને પગલે સેવા સેતુ કેમ્પમાં ૧૦૦ ટકા સફળતા પ્રાપ્ત થઈ -મંત્રી શ્રી રમણભાઈ સોલંકી

વિવિધ પ્રમાણપત્રો સહિતની સરકારી સેવાઓનો લાભ નાગરિકોને ઘરઆંગણે મળ્યો

આણંદ, મંગળવાર, બોરસદ તાલુકાના અલારસા ગામે સેવા સેતુ કાર્યક્રમનું આયોજન કરવામાં આવ્યું હતું આ કાર્યક્રમમાં અન્ન અને નાગરિક પુરવઠા મંત્રી શ્રી રમણભાઈ સોલંકી ઉપસ્થિત રહ્યા હતા તેમણે જણાવ્યું હતું કે મુખ્યમંત્રી શ્રી ભુપેન્દ્રભાઈ પટેલની દીર્ઘદ્રષ્ટિને કારણે સેવા સેતુ કાર્યક્રમના માધ્યમથી છેવાડાના માનવી સુધી સરકારની વિવિધ યોજના અને સહાયના લાભો હાથો હાથ અને એક જ છત નીચેથી ઘર આંગણે મળે તેવી વ્યવસ્થા ઊભી કરવામાં આવી છે, વહીવટી તંત્રની પારદર્શિતા અને ત્વરિત કામગીરીને પગલે સેવા સેતુ કેમ્પમાં ૧૦૦ ટકા સફળતા પ્રાપ્ત થઈ છે તેમ તેમણે વધુમાં કહ્યું હતું અને જિલ્લાભરમાં યોજાઇ રહેલા સેવા સેતુ કાર્યક્રમનો ગ્રામીણ જનતાએ લાભ લેવા અનુરોધ કર્યો હતો.

જિલ્લા કલેકટર શ્રી પ્રવીણ ચૌધરીના માર્ગદર્શન હેઠળ જિલ્લા ભરમા યોજવામાં આવી રહેલા સેવા સેતુ કાર્યક્રમના માધ્યમથી ગ્રામ્ય વિસ્તારના છેવાડાના લોકોને સરકારની વિવિધ યોજનાકીય સહાય, દાખલા અને લાભો ગામ ખાતે જ મળી રહ્યા છે.

ગ્રામીણ વિસ્તારના નાગરિકોના વહીવટી પ્રશ્નોના નિરાકરણ માટે યોજાયેલા “સેવા સેતુ” કાર્યક્રમમાં કુલ ૧૮૨૬ અરજીઓ પ્રાપ્ત થઈ હતી, જે તમામ ૧૮૨૬ અરજીઓનો સ્થળ પર જ હકારાત્મક નિકાલ કરીને વહીવટી તંત્ર દ્વારા ૧૦૦ ટકા કામગીરી પૂર્ણ કરવામાં આવી છે. સરકારના આ અભિગમથી ગ્રામીણ જનતાને તેમની સમસ્યાઓનું ત્વરિત સમાધાન શક્ય બન્યું છે.

આ સેવા સેતુ કાર્યક્રમમાં સૌથી વધુ સાત-બાર અને આઠ-અના ૮૫૫ પ્રમાણપત્રો સ્થળ પર જ એનાયત કરવામાં આવ્યા હતા. આ ઉપરાંત ૨૧૬ મિલકત આકારણીના ઉતારા અને ૧૪૯ જ્ઞાતિના પ્રમાણપત્રો આપવામાં આવ્યા હતા. જનમ-મરણના ૮૪ દાખલા અને આવકના ૨૭ પ્રમાણપત્રો સહિતના વ્યક્તિગત દસ્તાવેજોની પ્રક્રિયા પણ કેમ્પ દરમિયાન જ પૂર્ણ કરવામાં આવી હતી.

સામાજિક સુરક્ષા અને કલ્યાણકારી યોજનાઓની વાત કરીએ તો, પ્રધાનમંત્રી સુરક્ષા વીમા યોજના હેઠળ ૮૧ અને રાષ્ટ્રીય વૃદ્ધ પેન્શન યોજના અંતર્ગત ૩૧ અરજીઓનો હકારાત્મક નિકાલ કરવામાં આવ્યો હતો. ડિજિટલ સાક્ષરતાને પ્રોત્સાહન આપવા માટે ૮૧ નાગરિકોને ભીમ એપ બાબતે સહાય પૂરી પાડવામાં આવી હતી. આરોગ્ય ક્ષેત્રે પણ ૭૧ નાગરિકોને મેડિસિન સારવાર અને ૧૮ નાગરિકોને ડાયાબિટીસ તથા બી.પી.ની ચકાસણી સાથે હેલ્થ વેલનેસ કાર્ડની સુવિધા ઉપલબ્ધ કરાવાઈ હતી.

કેમ્પ દરમિયાન ખેડૂતલક્ષી સેવાઓ જેવી કે પ્રધાનમંત્રી કિસાન સન્માન નિધિ યોજનામાં ઈ-કેવાયસીની ૪૧ અરજીઓ અને રેશનકાર્ડમાં નામ દાખલ કરવા કે કમી કરવા જેવી પ્રક્રિયાઓ પણ કોઈ પણ વિલંબ વગર પૂર્ણ કરવામાં આવી હતી. વહીવટી તંત્ર દ્વારા સુનિશ્ચિત કરવામાં આવ્યું હતું કે કેમ્પના અંતે એક પણ અરજી પડતર ન રહે. આ કામગીરીમાં તાલુકાના વિવિધ વિભાગોના અધિકારીઓ અને કર્મચારીઓએ સંકલન સાધીને નાગરિકોને પડતી મુશ્કેલીઓનું નિવારણ લાવવા માટે સક્રિય ભૂમિકા ભજવી હતી.

સેવા સેતુના માધ્યમથી વહીવટી પ્રક્રિયા વધુ સરળ અને લોકાભિમુખ બની છે. આ કેમ્પમાં મળેલી તમામ ૧૮૨૬ અરજીઓનો ૧૦૦ ટકા હકારાત્મક નિકાલ એ શાસન અને પ્રશાસનની લોકહિત પ્રત્યેની પ્રતિબદ્ધતા દર્શાવે છે. ગ્રામીણ વિસ્તારના ક્લસ્ટર દ્વારા તૈયાર કરાયેલા આ ડેટા મુજબ, આધાર કાર્ડ સુધારણાથી લઈને બસ કન્સેશન પાસ સુધીની તમામ સેવાઓ એક જ છત નીચે પૂરી પાડવામાં વહીવટી તંત્ર સફળ રહ્યું છે.

આ કાર્યક્રમમાં બોરસદના પ્રાંત અધિકારી શ્રી અમિતભાઈ પટેલ, મામલતદાર શ્રી અને તાલુકા વિકાસ અધિકારી શ્રી, આરોગ્ય વિભાગના અધિકારી શ્રી આઇસીડીએસ વિભાગના અધિકારી કર્મચારીઓ સહિત પદાધિકારીઓ, અગ્રણીઓ અને ગ્રામજનો મોટી સંખ્યામાં ઉપસ્થિત રહ્યા હતા.

બોરસદ તાલુકાના અલારસા ગામે સેવા સેતુ કાર્યક્રમ યોજાયો