આણંદ જિલ્લાના બાગાયતી ખેડૂતો આઈ-ખેડૂત પોર્ટલ પર વિવિધ સહાય યોજનાઓ માટે અરજી પ્રક્રિયાનો પ્રારંભ

Publish Date : 05/09/2026

તા. ૩ થી ૧૭ સપ્ટેમ્બર દરમિયાન ઓનલાઈન અરજીઓ સ્વીકારવામાં આવશે

બાગાયત ખાતાની વિવિધ યોજનાઓ હેઠળ સહાય મેળવવા ખેડૂતોએ ‘આઈ-ખેડૂત પોર્ટલ ૨.૦’ પર નોંધણી કરાવવી ફરજિયાત

આણંદ, ગુરૂવાર, આણંદ જિલ્લામાં બાગાયતી પાકોની ખેતી કરતા અને આ ક્ષેત્રે નવો પ્રારંભ કરવા ઈચ્છતા ખેડૂતો માટે રાજ્ય સરકાર દ્વારા સહાય મેળવવા માટે તક જાહેર કરવામાં આવી છે. બાગાયત ખાતાની વિવિધ સહાયલક્ષી યોજનાઓનો લાભ લેવા માટે તારીખ ૦૩ સપ્ટેમ્બર થી ૧૭ સપ્ટેમ્બર સુધી આઈ-ખેડૂત પોર્ટલ ખુલ્લું મૂકવામાં આવશે. આ સમયગાળા દરમિયાન જિલ્લાના તમામ પાત્રતા ધરાવતા ખેડૂતો ઓનલાઈન માધ્યમથી પોતાની અરજીઓ નોંધાવી શકશે.

રાજ્ય સરકારના બાગાયત વિભાગ દ્વારા ખેડૂતોની આવક વધારવા અને ખેતીમાં આધુનિક ટેકનોલોજીનો વ્યાપ વધારવાના ઉદ્દેશ્ય સાથે વિવિધ ઘટકોનો સમાવેશ કરવામાં આવ્યો છે. આ યોજનાઓ હેઠળ મુખ્યત્વે બહુસ્તરીય પદ્ધતિથી ફળ પાકોનો વાવેતર વિસ્તાર વધારવાનો કાર્યક્રમ તેમજ ફળપાકોમાં ફિલ્ડ કવર ટેકનોલોજીના ઉપયોગ થકી ગુણવત્તાયુક્ત ઉત્પાદન મેળવવા માટે આર્થિક સહાય પૂરી પાડવામાં આવશે. આધુનિક બાગાયતી ખેતી તરફ વળેલા ખેડૂતોને પ્રોત્સાહન પૂરું પાડવા માટે આ ઘટકો અત્યંત ઉપયોગી સાબિત થશે.

અરજી કરવાની પ્રક્રિયા અંગે જણાવવામાં આવ્યું છે કે, ખેડૂતોએ આઈ-ખેડૂત પોર્ટલ (https://ikhedut.gujarat.gov.in) પર જઈને નિયત સમયમાં ઓનલાઈન ફોર્મ ભરવાનું રહેશે. આ વખતે સરકારે નવીન ‘આઈ-ખેડૂત પોર્ટલ ૨.૦’ કાર્યરત કર્યું હોવાથી, કોઈપણ યોજનામાં લાભ લેવા માટે ખેડૂતોએ સૌ પ્રથમ પોર્ટલ પર પોતાની નોંધણી કરાવવી ફરજિયાત છે. સફળ નોંધણી બાદ જ ખેડૂતો વિવિધ બાગાયતી યોજનાઓ માટે ઓનલાઈન અરજી કરી શકશે. અરજી કરવાની આ પ્રક્રિયા સંપૂર્ણપણે પારદર્શક અને ડિજિટલ માધ્યમથી સંપન્ન કરવામાં આવશે.

અરજી પ્રક્રિયા પૂર્ણ કરવા માટે ખેડૂતોએ પોર્ટલ પર જરૂરી તમામ કાગળો અને દસ્તાવેજો અપલોડ કરવાના રહેશે. અરજી કન્ફર્મ થયા બાદ તેની પ્રિન્ટ કાઢીને ખેડૂતોએ પોતાની પાસે જ રાખવાની રહેશે. પ્રાપ્ત થયેલી તમામ અરજીઓની ચકાસણી સરકારના યોજનાકીય નિયમો અનુસાર કરવામાં આવશે. ત્યારબાદ વિભાગ દ્વારા ફાળવવામાં આવેલ લક્ષ્યાંકોની મર્યાદામાં અને યોગ્યતાના ધોરણે ખેડૂતોને સહાય માટે પસંદ કરવામાં આવશે. આ અંગે વધુ માહિતી માટે આણંદ જિલ્લાની નાયબ બાગાયત નિયામકની કચેરીનો સંપર્ક સાધવા જણાવાયું છે.