આણંદ જિલ્લામાં માર્ગોની યુદ્ધના ધોરણે મરામત: 08 વિશેષ ટીમો દ્વારા તમામ તાલુકાઓમાં કામગીરી પૂરજોશમાં

Publish Date : 27/07/2026

રેઇન કટ,પેચવર્ક, ડ્રેનેજ ક્રોસ રિપેરિંગની કામગીરી હાલ પ્રગતિ હેઠળ

આણંદ, રવિવાર, આણંદ જિલ્લામાં તાજેતરમાં થયેલા ભારે વરસાદની પરિસ્થિતિને પગલે આણંદ જિલ્લાના પ્રભારી મંત્રી શ્રી સંજયસિંહ મહિડાએ જિલ્લાના અધિકારીઓ સાથે બેઠક કરી જિલ્લામાં થયેલ ભારે વરસાદ બાદ કરવામાં આવનાર કામગીરીની સમીક્ષા કરી હતી. મંત્રી શ્રી એ આપેલ સૂચના અને માર્ગદર્શન મુજબ જિલ્લામાં ભારે વરસાદને કારણે ક્ષતિગ્રસ્ત રસ્તાઓનું રીપેરીંગ કરી વાહન વ્યવહાર પુનઃ ઝડપથી પૂર્વવત કરવા તેમજ માર્ગોની સુરક્ષા સુનિશ્ચિત કરવા માટે માર્ગ અને મકાન (સ્ટેટ) તથા પંચાયત વિભાગ દ્વારા વ્યાપક યુદ્ધના ધોરણે કામગીરી હાથ ધરવામાં આવી રહી છે.

અન્ન અને નાગરિક પુરવઠા મંત્રી શ્રી રમણભાઈ સોલંકી અને નાણા રાજ્યમંત્રી શ્રી કમલેશભાઈ પટેલ, આણંદ જિલ્લાના સાંસદ શ્રી, ધારાસભ્યશ્રીઓ, જિલ્લા પંચાયતના પ્રમુખશ્રી અને જિલ્લા પંચાયતના સદસ્યશ્રીઓ દ્વારા પણ જિલ્લાના સ્ટેટના અને ગ્રામ્ય વિસ્તારના ખરાબ થયેલા રસ્તાઓ પુનઃ કાર્યરત થાય તે માટે ઝડપથી કામગીરી હાથ ધરવા જણાવ્યું હતું.

આણંદ જિલ્લાના સ્ટેટ અને પંચાયત હસ્તકના વરસાદને કારણે ક્ષતિગ્રસ્ત થયેલા રસ્તાઓના દુરસ્તી કરણ માટે જિલ્લા કલેકટર શ્રી પ્રવીણ ચૌધરી અને જિલ્લા વિકાસ અધિકારી સુશ્રી દેવાહુતી ના માર્ગદર્શન હેઠળ સ્ટેટ અને પંચાયત વિભાગની સંયુક્ત રીતે કુલ 08 ટીમો બનાવવામાં આવી છે. આ ટીમો દ્વારા જિલ્લાના તમામ તાલુકાઓમાં રસ્તાઓ પર પડેલા ખાડાઓ પૂરાવા, ધોવાણ સરખું કરવું અને રસ્તાઓ સલામત બનાવવાની કામગીરી હાથ ધરવામાં આવી રહી છે.

હાલ આ કામગીરી તારાપુર, ખંભાત, બોરસદ, પેટલાદ, સોજિત્રા, આંકલાવ, આણંદ અને ઉમરેઠ તાલુકાના ગામો ખાતે ઝડપથી ચાલી રહી છે. ભારે વરસાદના કારણે માર્ગોની સાઇડમાં પડેલા રેઇન કટ નું પુરાણ, રસ્તા પર પડેલા ખાડાઓનું પેચવર્ક, ડ્રેનેજ ક્રોસિંગ રિપેરિંગ તેમજ વરસાદના કારણે રસ્તાઓ પર નમી પડેલા વૃક્ષો કે ડાળીઓ હટાવવાની કામગીરી પૂર્ણ ઝડપથી પ્રગતિ હેઠળ છે. તંત્ર દ્વારા અત્યાધુનિક મશીનરી અને પૂરતા માનવબળનો ઉપયોગ કરીને વાહનચાલકોને કોઈ મુશ્કેલી ન પડે તે માટે રસ્તાઓ તાત્કાલિક સાફ અને સુગમ બનાવવામાં આવી રહ્યા છે.

માર્ગ અને મકાન વિભાગની ટીમ દ્વારા સ્થળ પર રૂબરૂ મુલાકાત લઈને કામગીરીની ગુણવત્તા અને ઝડપ પર સતત નિરીક્ષણ રાખવામાં આવી રહ્યું છે. બંધ કે અસરગ્રસ્ત રસ્તાઓને શક્ય તેટલા ટૂંક સમયમાં સલામત રીતે ખુલ્લા મૂકવા માટે માર્ગ અને મકાન વિભાગની ટીમ રાત-દિવસ કાર્યરત છે.

માર્ગ અને મકાન વિભાગ રાજ્ય અને પંચાયતના કાર્યપાલક ઇજનેર શ્રી હિતેશ ગઢવીના જણાવ્યા મુજબ પોરડા થી અથુલ રોડ ઉપર તળાવ પાસે રેઇન કટ પડતાં તાત્કાલિક ધોરણે મરામત કરાવી ટ્રાફિક ખુલ્લો મુકવામાં આવ્યો છે. મહેળાવ શ્રીજીપુરા રોડ ઉપર નવા બનાવેલ બોક્સ કલ્વર્ટની બાજુમાં રેઇન કટ પડતાં તાત્કાલિક ધોરણે મરામત કરવામાં આવ્યો છે અને આણંદના ત્રિભુવનદસ ફાઉંડેશન રોડ પર રેઇન કટ રિપેરિંગની કામગીરી, જલંધ ઉંદેલ રોડ, કાસોર રાહ તલાવ રોડ, તારાપુર ખંભાત રોડ ઉપર બેરીકેટની કામગીરી પૂર્ણ કરવામાં આવી છે.

આમ, આણંદ જિલ્લામાં વરસાદે વિરામ લેતા ગ્રામ્ય અને સ્ટેટના જે રસ્તાઓ ખરાબ થયા છે તેને પૂર્વ વત અને મોટરેબલ કરવાની કામગીરી માર્ગ અને મકાન વિભાગ ની 08 ટીમો દ્વારા યુદ્ધના ધોરણે હાથ ધરવામાં આવી છે.

આણંદ જિલ્લામાં માર્ગોની યુદ્ધના ધોરણે મરામત: 08 વિશેષ ટીમો દ્વારા તમામ તાલુકાઓમાં કામગીરી પૂરજોશમાં