આણંદ જિલ્લામાં ઉપરવાસના વરસાદી પાણીના પ્રવાહને કારણે પંચાયત હસ્તકના ચાર માર્ગો બંધ કરાયા

Publish Date : 27/07/2026

તારાપુર તાલુકાના ચાર રસ્તાઓ પર વાહન વ્યવહાર સ્થગિત, વૈકલ્પિક વ્યવસ્થા જાહેર

ઓવરટોપિંગને કારણે તારાપુર પંથકમાં માર્ગો પ્રભાવિત, ૨૮ જુલાઈ સુધીમાં રસ્તાઓ પુનઃ શરૂ થવાની સંભાવના

ઉપરવાસમાં ભારે વરસાદને પગલે પાણીનો પ્રવાહ વધતા તંત્ર દ્વારા લેવાયો સાવચેતીભર્યો નિર્ણય

અસરગ્રસ્ત ગામો માટે વૈકલ્પિક માર્ગોની સુવિધા, ડાયવર્ઝન આપી ટ્રાફિક કાર્યરત રખાયો

 આણંદ, શુક્રવાર , ગુજરાત રાજ્યના માર્ગ અને મકાન વિભાગ દ્વારા જાહેર કરવામાં આવેલી વિગતો અનુસાર, ૨૪ જુલાઈ ૨૦૨૬ના રોજ સાંજના ૧૭:૦૦ કલાકની સ્થિતિએ આણંદ જિલ્લાના ખંભાત અને તારાપુર પંથકમાં ભારે વરસાદ અને ઉપરવાસમાંથી આવતા પાણીના પ્રવાહને કારણે કુલ ચાર પંચાયત હસ્તકના રસ્તાઓ વાહન વ્યવહાર માટે બંધ કરવામાં આવ્યા છે. ખાસ કરીને તારાપુર તાલુકામાં વરસાદી પાણીનો પ્રવાહ એકાએક વધી જવાથી રસ્તાઓ પર પાણી ફરી વળવાની (ઓવર ટોપિંગ) સ્થિતિ સર્જાતા જાહેર જનતાની સલામતીના ભાગરૂપે આ માર્ગો બંધ કરવાનો નિર્ણય લેવામાં આવ્યો છે.

 બંધ થયેલા માર્ગોની વિગતોમાં તારાપુર રાજવાપુરા રોડ, મિલરામપુરા ખડા રોડ, મિલરામપુરા મોટા કલોદરા રોડ અને મિલરામપુરા કાનાવાડા રોડનો સમાવેશ થાય છે, જ્યાં પાણીનો પ્રવાહ માર્ગની સપાટીથી ઉપર હોવાને કારણે અવરજવર માટે જોખમી છે. વહીવટી તંત્ર દ્વારા આ અસરગ્રસ્ત ગામોના નાગરિકો માટે તાત્કાલિક ધોરણે વૈકલ્પિક વ્યવસ્થા સુનિશ્ચિત કરવામાં આવી છે, જેમાં તારાપુર રાજવાપુરા હયાત રોડ અને મિલરામપુરા દુગારી રોડ જેવા વૈકલ્પિક માર્ગો દ્વારા વાહન વ્યવહાર ડાયવર્ટ કરવામાં આવ્યો છે. માર્ગ અને મકાન વિભાગના અંદાજ મુજબ આ તમામ બંધ રસ્તાઓ આગામી ૨૮ જુલાઈ ૨૦૨૬ સુધીમાં પાણી ઓસરતાની સાથે જ વાહન વ્યવહાર માટે પુનઃ કાર્યરત થવાની સંભાવના છે, ત્યાં સુધી મુસાફરોને વૈકલ્પિક માર્ગોનો ઉપયોગ કરવા અને સાવચેતી રાખવા અનુરોધ કરવામાં આવ્યો છે.