આણંદ જિલ્લાના સોજીત્રા અને તારાપુર તાલુકામાં 04 નવી માધ્યમિક અને ઉચ્ચતર માધ્યમિક શાળાઓને મળી મંજૂરી

Publish Date : 20/06/2026

ગુજરાત સરકારનો મહત્વનો નિર્ણય: આર.એમ.એસ.એ. કમ્પોઝિટ શાળાઓ અંતર્ગત આણંદના ગ્રામ્ય વિસ્તારોમાં શિક્ષણનું સ્તર વધુ સુદ્રઢ બનશે

અંતરિયાળ ગામોના વિદ્યાર્થીઓને ઘરઆંગણે મળશે માધ્યમિક શિક્ષણની સુવિધા; નવા મહેકમ અને વહીવટી પ્રક્રિયા માટે તંત્ર સજ્જ

આણંદ, શુક્રવાર, ગુજરાત સરકારના શિક્ષણ વિભાગ દ્વારા રાજ્યના શૈક્ષણિક માળખાને વધુ મજબૂત કરવાના ઉમદા હેતુ સાથે આણંદ જિલ્લામાં ચાર નવી માધ્યમિક અને ઉચ્ચતર માધ્યમિક શાળાઓની મંજૂરી આપવામાં આવી છે.

વર્ષ ૨૦૨૬-૨૭ના અંદાજપત્રની જોગવાઈઓ હેઠળ રાજ્યની હયાત પ્રાથમિક શાળાઓમાં નવી ૨૦૦ RMSA (રાષ્ટ્રીય માધ્યમિક શિક્ષા અભિયાન) કમ્પોઝિટ શાળાઓ શરૂ કરવાના મહત્વકાંક્ષી પ્રોજેક્ટ અંતર્ગત આણંદ જિલ્લાના સોજીત્રા અને તારાપુર તાલુકાના અંતરિયાળ ગામોની પસંદગી કરવામાં આવી છે.

આ નિર્ણયથી આણંદ જિલ્લાના ગ્રામ્ય વિસ્તારના વિદ્યાર્થીઓને હવે ઉચ્ચ શિક્ષણ માટે લાંબા અંતર સુધી જવાની જરૂર રહેશે નહીં અને તેઓને પોતાના જ ગામ કે નજીકના વિસ્તારમાં ગુણવત્તાયુક્ત શિક્ષણ પ્રાપ્ત થશે.

આ શૈક્ષણિક મંજૂરીની વિગતો મુજબ, આણંદ જિલ્લાના સોજીત્રા તાલુકામાં ત્રંબોવડ ગામે નવી માધ્યમિક અને ઉચ્ચતર માધ્યમિક શાળા કાર્યરત કરવામાં આવશે. આ ઉપરાંત, તારાપુર તાલુકાના ત્રણ મહત્વના ગામો ચંગાડા, ખાનપુર અને ઊંટવાડા ખાતે પણ નવી શાળાઓને વહીવટી મંજૂરી આપી દેવામાં આવી છે.

રાજ્ય સરકારના આ નિર્ણયને પગલે આ ગામોમાં લાંબા સમયથી ચાલી આવતી માધ્યમિક શિક્ષણની જરૂરિયાત સંતોષાશે. આ શાળાઓ કમ્પોઝિટ મોડેલ પર આધારિત હોવાથી પ્રાથમિકથી માધ્યમિક સુધીનું શિક્ષણ એક જ શૈક્ષણિક સંકુલમાં સુલભ બનશે, જે વિદ્યાર્થીઓના સર્વાંગી વિકાસમાં પાયાનું કામ કરશે.

શિક્ષણ વિભાગના સત્તાવાર ઠરાવ અનુસાર, આ નવી ૨૦૦ RMSA કમ્પોઝિટ શાળાઓમાં નવા મહેકમની જોગવાઈ કરવા માટે કુલ ૩.૪૮ કરોડ જેટલી માતબર રકમની નવી બાબત તરીકે વહીવટી મંજૂરી આપવામાં આવી છે. આ બજેટનો ઉપયોગ શાળાઓમાં જરૂરી શિક્ષણ સહાયકોની ભરતી અને વહીવટી સંસાધનો ઊભા કરવા માટે કરવામાં આવશે.

આણંદ જિલ્લાના આ ચાર ગામોમાં પણ નિયત ધોરણો મુજબ લાયકાત ધરાવતા શિક્ષકો અને વહીવટી સ્ટાફની નિમણૂક કરવાની પ્રક્રિયા હાથ ધરવામાં આવશે, જેથી આગામી શૈક્ષણિક સત્રથી વિદ્યાર્થીઓને તેનો સીધો લાભ મળી શકે.

જિલ્લા શિક્ષણાધિકારીની કચેરી અને સ્થાનિક વહીવટી તંત્રને આ અંગેની આનુષંગિક કાર્યવાહી ત્વરિત ગતિએ પૂર્ણ કરવા માટે સૂચનાઓ આપી દેવામાં આવી છે. આ નવી શાળાઓ શરૂ થવાથી આણંદ જિલ્લામાં ડ્રોપ-આઉટ રેશિયોમાં ઘટાડો થશે અને ખાસ કરીને કન્યા શિક્ષણને મોટો વેગ મળશે તેવી અપેક્ષા રાખવામાં આવી રહી છે.

ગ્રામ્ય સ્તરે શિક્ષણની સુવિધા ઉપલબ્ધ કરાવીને છેવાડાના માનવી સુધી જ્ઞાનની જ્યોત પહોંચાડવાના સરકારના આ અભિગમને સ્થાનિક રજૂઆતકર્તાઓ અને વાલીઓએ આવકાર્યો છે. આ શાળાઓ આગામી સમયમાં આણંદ જિલ્લાના શૈક્ષણિક નકશા પર પરિવર્તન લાવનારી સાબિત થશે.