સરદાર@૧૫૦ :: યુનિટી માર્ચ

Publish Date : 28/11/2025

આણંદ ખાતે આન, બાન અને શાન સાથે જિલ્લા  કક્ષાની એકતા પદયાત્રા  યોજાઈ

પ્રધાનમંત્રી નરેન્દ્રભાઈ મોદી સરદાર પટેલના નકશે કદમ પર  ચાલીને દેશની એકતા અને અખંડિતતા માટે કાર્યો કરી રહ્યા છે: સાંસદશ્રી

અમૂલ ડેરીથી ટાઉન હોલ ખાતે જિલ્લા કક્ષાની એકતા પદયાત્રા યોજાઈ

શૈક્ષણિક સંસ્થાઓના વિદ્યાર્થીઓએ સાંસ્કૃતિક કૃતિ રજૂ કરીને વાતાવરણને દેશભક્તિથી તરબોળ બનાવ્યું

આણંદ,બુધવાર: સરદાર વલ્લભભાઈ પટેલની ૧૫૦ મી જન્મજયંતિના અવસરે સમગ્ર દેશમાં રાષ્ટ્રીય પદયાત્રા યોજાઈ હતી.જે અન્વયે રાજયની તમામ ૧૮૨ વિધાનસભામાં એકતા પદયાત્રા યોજાઈ રહી છે.

આણંદ જિલ્લામાં પણ આન,બાન અને શાન સાથે જિલ્લા કક્ષાની એકતા પદયાત્રા સાંસદ શ્રી મિતેશભાઈ પટેલ અન્ય પદાધિકારીઓ અને જિલ્લા કલેક્ટર શ્રી પ્રવીણ ચૌધરી સહિતના અધિકારીની પ્રેરક ઉપસ્થિતિમાં યોજાઈ હતી.

આ પદયાત્રામાં મહાનુભાવો દ્વારા અમૂલ ડેરીના પ્રાંગણમાં આવેલ સરદાર વલ્લભભાઈ પટેલની અર્ધપ્રતિમાને સુતરની આંટી પહેરાવીને ભાવાંજલિ અર્પણ કરીને પદયાત્રાને  ફ્લેગ ઑફ કરીને  શુભારંભ કરાવ્યો હતો.

આ પ્રસંગે સાંસદશ્રી મિતેશભાઈ પટેલે જણાવ્યું હતું કે,અખંડ ભારતના શિલ્પી એવા સરદાર વલ્લભભાઈ પટેલે સ્વાતંત્ર્ય સંગ્રામ દરમિયાન જે રીતે હૈદરાબાદ, જૂનાગઢ સહિતના ૫૬૨ રજવાડાઓ એકત્ર કર્યા તે કાર્ય માત્ર ને માત્ર સરદાર પટેલ જ કરી શકે.વધુમાં સાંસદશ્રીએ ઉમેરતા જણાવ્યું કે,સરદાર પટેલની ૧૫૦ મી જન્મજયંતિના અવસરે કરમસદ થી કેવડિયા સુધી રાષ્ટ્રીય પદયાત્રાનું ભવ્ય આયોજન કરીને પ્રધાનમંત્રીશ્રી એ સાચા અર્થમાં સરદાર પટેલને શ્રદ્ધાજંલી અર્પણ કરી છે.

વધુમાં સાંસદશ્રી એ જણાવ્યું હતું કે, પ્રધાનમંત્રી નરેન્દ્રભાઈ મોદી સરદાર પટેલના નકશે કદમ ઉપર ચાલીને દેશને એકતા અને અખંડિતતા માટે છેલ્લા એક દાયકાથી ભગીરથ પ્રયાસો કરી રહ્યા છે.આજની પેઢીએ પણ પ્રધાનમંત્રીશ્રીના વિકસિત ભારત @૨૦૪૭ની પરિકલ્પના સાકાર કરવા સાંસદશ્રીએ હિમાયત કરી હતી.

આ ઉપરાંત સાંસદશ્રીએ સ્વદેશી અપનાવીને દેશની ઇકોનોમીને સમગ્ર વિશ્વમાં અગ્રેસર બનાવવામાં મદદરૂપ થવા પણ જણાવ્યું હતું. વધુમાં એકતા પદયાત્રાનું સુચારુ આયોજન બદલ જિલ્લા વહીવટી તંત્રને પણ સાંસદશ્રીએ અભિનંદન  પાઠવ્યા હતા.

ધારાસભ્ય શ્રી યોગેશભાઈ પટેલે પણ પ્રાસંગિક ઉદબોધનમાં જણાવ્યું હતું કે,સરદાર પટેલની ૧૫૦ મી જન્મજયંતિના અવસરે રાજ્યની તમામ ૧૮૨ વિધાનસભા વિસ્તારમાં એકતા પદયાત્રાનું આયોજન હાથ ધરવામાં આવ્યું છે ત્યારે આણંદ જિલ્લામાં જિલ્લાકક્ષાની એકતા પદયાત્રા અમૂલ ડેરીથી સરદાર  ટાઉનહોલ ખાતે ખાતે યોજાઈ હતી જેમાં મોટી સંખ્યામાં આણંદના  નગરજનો ઉપસ્થિત રહ્યાં તે બદલ તેમનો ધારાસભ્યશ્રીએ આભાર વ્યક્ત કર્યો હતો.

આ પ્રસંગે જિલ્લા અગ્રણી સંજયભાઈ પટેલ તથા વડોદરાના પૂર્વ મેયર શ્રી ભરત ભાઈ ડાંગરે પ્રાસંગિક પ્રવચન કર્યું હતું.

આ પ્રસંગે મહાનુભાવોના વરદહસ્તે શૈક્ષણિક વર્ષમાં ઉત્કૃષ્ટ પ્રદર્શન કરનાર વિધાર્થીઓને પ્રમાણપત્ર આપીને પ્રોત્સાહિત કરવામાં આવ્યા હતા.

પદયાત્રાના પ્રારંભમાં સાંસદશ્રી સહિતના મહાનુભાવોએ અમૂલ ડેરી સ્થિત સરદાર પટેલની અર્ધપ્રતિભાને સુતરની આંટી તથા ફૂલહાર પહેરાવીને ભાવાંજલિ આપીને  ત્યારબાદ પદયાત્રાને ફ્લેગ ઓફ કરાયો હતો તથા કાર્યક્રમ અંતે  સ્વદેશીના સપથ લેવામાં આવ્યા હતા.

અત્રે ઉલ્લેખનીય છે કે,એકતા પદયાત્રામાં આણંદની શૈક્ષણિક સંસ્થાઓના બાળકો દ્વારા સાંસ્કૃતિક કૃતિ રજૂ કરીને વાતાવરણને દેશભક્તિથી તરબોળ બનાવ્યું હતું.

આ સમયે જિલ્લા પંચાયત પ્રમુખ શ્રી હસમુખભાઈ પટેલ,અમૂલ ડેરીને વાઇસ ચેરમેન શ્રી કાંતિભાઈ સોઢા પરમાર, જિલ્લા કલેક્ટર શ્રી પ્રવીણ ચૌધરી, જિલ્લા વિકાસ અધિકારી સુશ્રી દેવાહુતી, જિલ્લા પોલીસ અધિક્ષકશ્રી ગૌરવ જસાણી,નાયબ મ્યુનિસિપલ કમિશનર શ્રી નિલાક્ષા મકવાણા સહિત જિલ્લાના વહીવટી તંત્રના અધિકારીઓ, કર્મચારીઓ,પોલીસ કર્મીઓ, આણંદ જિલ્લાના અગ્રણીઓ, વિવિધ શૈક્ષણિક સંસ્થાઓના શિક્ષકો, વિધાર્થીઓ,એન.એસ.એસ.તથા એન.સી.સી.ના  કેડેટ સહિત મોટી સંખ્યામાં નગરજનો ઉપસ્થિત રહ્યાં હતાં.