આણંદ ખાતે જિલ્લા સંકલન અને ફરિયાદ સમિતિની બેઠક યોજાઈ

Publish Date : 20/07/2026

નાગરિકોને લગતા પડતર પ્રશ્નોનું તાત્કાલિક યોગ્ય નિરાકરણ કરવા સબંધિત અધિકારીઓને જિલ્લા કલેકટરશ્રીની તાકીદ

ચોમાસા દરમિયાન નાગરિકોને કોઈપણ પ્રકારની તકલીફ ન પડે તેવું આયોજન કરવા સૂચના

આણંદ, શનિવાર , આણંદ જિલ્લા કલેકટરશ્રી પ્રવીણ ચૌધરીના અધ્યક્ષસ્થાને કલેક્ટર કચેરી,આણંદના સભાખંડ ખાતે જિલ્લા સંકલન અને ફરિયાદ સમિતિની બેઠક યોજાઈ હતી.

બેઠક દરમિયાન કલેક્ટરશ્રી પ્રવીણ ચૌધરીએ નાગરિકોની સુખાકારી સાથે જોડાયેલા અનેક મહત્વના વિષયો અને કામગીરી વિશે સમીક્ષા કરી જરૂરી બાબતો અંગે માર્ગદર્શન આપ્યું હતું. જેમાં વીજ કંપની (MGVCL), માર્ગ અને મકાન, સિંચાઈ, આરોગ્ય, વન વિભાગ, નગરપાલિકા, કાંસ વિભાગ તથા ઔદ્યોગિક વિકાસ અને ખાણ-ખનીજ વિભાગ સહિત વિવિધ વિભાગોને સ્પર્શતી બાબતોનો સમાવેશ કરાયો હતો. આ તમામ પ્રજાલક્ષી પ્રશ્નો અંગે સંબંધિત વિભાગોને સત્વરે અને યોગ્ય કાર્યવાહી કરવા માટે જિલ્લા કલેક્ટરશ્રી દ્વારા સ્પષ્ટ સુચનો આપવામાં આવ્યા હતા.

આ બેઠકમાં જિલ્લાના જનપ્રતિનિધિઓ દ્વારા રજૂ કરવામાં આવેલા લોકહિતના વિવિધ મુદ્દાઓ પર ગંભીરતાપૂર્વક ચર્ચા કરવામાં આવી હતી. જેમાં ચોમાસા દરમિયાન નાગરિકોને કોઈપણ પ્રકારની તકલીફ ન પડે તે જોવા ખાસ અનુરોધ કર્યો હતો. આ ઉપરાંત ખરાબ રસ્તાનું સમારકામ કરવા, સરકારી કચેરીઓમાં સમય મર્યાદામાં નાગરિકોની અરજીઓનો સકારાત્મક અભિગમ સાથે ઝડપી નિકાલ કરવા જણાવ્યું હતું. આ ઉપરાંત, નવા વીજ કનેક્શનની પડતર અરજીઓ અંગે સત્વરે કાર્યવાહી કરવા તેમજ જિલ્લામાં વીજકાપ અને ઓવરલોડની સમસ્યા નિવારવા નવા ટ્રાન્સફોર્મરની માંગણી અંગે યોગ્ય કાર્યવાહી કરવા, વીજ વિભાગના કંટ્રોલ રૂમને ચોવીસ કલાક કાર્યરત રાખવા, પીવાના પાણીની વ્યવસ્થા સુનિશ્ચિત કરવા, રસ્તાઓ પરથી ઝાડનું ટ્રેમિંગ કરવા, દબાણ દૂર કરવા અંગે, નવીન જીઆઇડીસી અર્થે સત્વરે કામગીરી હાથ ધરવા, કાંસની સાફ સફાઇ કરવા અધિકારીઓને જરૂરી સૂચનાઓ આપી હતી.

આ બેઠકમાં સાંસદશ્રી મિતેશભાઈ પટેલ, જિલ્લા પંચાયત પ્રમુખશ્રી મયુરીબેન પટેલ, ધારાસભ્ય સર્વ શ્રી વિપુલભાઈ પટેલ, શ્રી હર્ષદભાઈ પરમાર, જિલ્લા વિકાસ અધિકારી સુશ્રી દેવાહુતી, જિલ્લા પોલીસ અધિક્ષકશ્રી ગૌરવ જસાણી, નિવાસી અધિક કલેકટરશ્રી લલિત કુમાર પટેલ, અધિક કલેકટરશ્રી રાહુલ ગમારા, જિલ્લા ગ્રામ વિકાસ એજન્સીના નિયામકશ્રી જે.વી.દેસાઈ, નાયબ મ્યુનિસિપલ કમિશ્નરશ્રી એસ.કે.ગરવાલ અને શ્રી સંગાડા, માર્ગ અને મકાન વિભાગના કાર્યપાલક ઇજનેરશ્રી ગઢવી સહિતના વિવિધ વિભાગના અધિકારીઓ ઉપસ્થિત રહ્યા હતા જ્યારે આણંદના ધારાસભ્યશ્રી યોગેશ ભાઈ પટેલ અને જિલ્લા પંચાયત અને તાલુકા કક્ષાની કચેરીઓના અધિકારીઓ વીડિયો કોન્ફરન્સના માધ્યમથી બેઠકમાં જોડાયા હતા.

આણંદ ખાતે જિલ્લા સંકલન અને ફરિયાદ સમિતિની બેઠક યોજાઈ