હિટવેવને અનુલક્ષીને આણંદની જનતાને આરોગ્ય વિભાગની માર્ગદર્શક  સૂચનાઓ

પ્રકાશિત તારીખ : 05/04/2025

આણંદ ,શુક્રવાર: ચાલુ વર્ષની શરૂઆતમાં જ દિવસના તાપમાનમાં વધારો થઈ રહ્યો છે. ગરમીના વધારાના કારણે શરીરમાં લુ લાગવાના કેસો નોંધાતા હોય છે. જેમાં સમયસરની સારવાર લેવામાં ન આવે તો જીવલેણ સાબિત થઈ શકે છે. લુ લાગવાના કેસોમાં સામાન્ય રીતે શરીરનું તાપમાન ખૂબ વધી જાય વાતાવરણનું તાપમાન ઊંચું હોવાથી પરસેવો ખૂબ વધારે થાય છે અને જેના કારણે શરીરનું તાપમાન ઘટી શકતું નથી. જે વ્યક્તિના આરોગ્ય ઉપર વિપરીત અસરો કરે છે.

આણંદ જિલ્લામાં સિવિલ હોસ્પિટલ પેટલાદ અને આણંદ તથા ૧૪- સામૂહિક આરોગ્ય કેન્દ્રમાં હીટ સ્ટોકના કારણે બીમાર દર્દીઓની સારવાર કરવા વ્યવસ્થા કરવામાં આવેલ છે તથા તમામ પ્રાથમિક આરોગ્ય કેન્દ્ર ખાતે પ્રાથમિક સારવાર આપી રિપોર્ટ કરવાની વ્યવસ્થા અને તાલીમ તમામને આપેલ છે.

હિટ સ્ટોકના લક્ષણો:

શરીર અને હાથ પગમાં અસહ્ય દુખાવો થવો, ખુબ તરસ લાગવી, ગભરામણ થવી, ચક્કર આવવા,શ્વાસ ચઢવો ,હૃદયના ધબકારા વધી જવા વગેરે હિટ સ્ટોકના લક્ષણો જોવા મળે છે.

હિટ સ્ટોકથી બચવા જાહેર જનતાએ તકેદારી રાખવી:

ગરમીમાં બને ત્યાં સુધી બહાર જવાનું ટાળવું, ઉનાળાની ઋતુ દરમિયાન ખુલતા સફેદ કપડા પહેરવા જોઈએ, નાના બાળકો સગર્ભા માતાઓ વૃધ્ધો તથા અશકત વ્યક્તિઓએ તડકામાં ફરવું નહીં, દિવસ દરમિયાન પુષ્કળ પ્રમાણમાં પાણી,પ્રવાહી પીવું શક્ય હોય તો લીંબુનું શરબત બનાવીને પીવું જોઈએ, ભીના કપડાથી માથું ઢાંકી રાખવું અને જરૂર જણાય અવારનવાર ભીના કપડાથી શરીર લૂછવું, ગરમીની ઋતુ દરમિયાન બને ત્યાં સુધી ભૂખ્યા ન રહેવું, માથાનો દુખાવો બેચેની ચક્કર ઉબકા કે તાવ આવે તો તરત  જ નજીકના દવાખાના પ્રાથમિક આરોગ્ય કેન્દ્ર કે હોસ્પિટલમાં ડોક્ટરની સલાહ અને સારવાર લેવા પણ આરોગ્ય વિભાગ દ્વારા જણાવવામાં આવ્યું છે.આ ઉપરાંત ઓ.આર.એસનો ઉપયોગ કરવા પણ જણાવવામાં આવ્યું છે.

હિટવેવના કારણે જોવા મળતી બીમારીઓ તથા તેના લક્ષણોએ અનુલક્ષીને પ્રાથમિક સારવાર લેવાનું પણ આરોગ્ય વિભાગ દ્વારા અનુરોધ કરાયો છે.