આણંદ તાલુકામાં કન્યા કેળવણી અને શાળા પ્રવેશોત્સવનો ત્રિ-દિવસીય શૈક્ષણિક યજ્ઞ પ્રારંભ થશે

નાયબ સચિવ પ્રવિણાબેન પટેલના નેતૃત્વમાં આણંદની વિવિધ શાળાઓમાં બાળકોને ઉમળકાભેર પ્રવેશ અપાશે

હાડગુડ, વડોદ, આણંદ વિ.જે. પટેલ પ્રેક્ટિસિગ હાઇસ્કુલ, કરમસદ, જોળ, વિદ્યાનગરની શાળાઓ ખાતે બાલવાટિકાથી ધોરણ-૯ સુધીના પ્રવેશાર્થીઓનું કુમકુમ તિલકથી સ્વાગત કરાશે

આણંદ, સોમવાર, ગુજરાત સરકાર દ્વારા શિક્ષણના સ્તરને ઉંચુ લાવવા અને શત-પ્રતિશત નામાંકન સુનિશ્ચિત કરવાના ઉમદા હેતુ સાથે આણંદ તાલુકામાં આગામી ૨૩ જૂન થી ૨૫ જૂન દરમિયાન ‘કન્યા કેળવણી મહોત્સવ અને શાળા પ્રવેશોત્સવનું આયોજન કરવામાં આવ્યું છે.

આ કાર્યક્રમ ગાંધીનગરના કાનૂની વિભાગના નાયબ સચિવ શ્રીમતી પ્રવિણાબેન એમ. પટેલની વિશેષ ઉપસ્થિતમાં કરવામાં આવશે, જેઓ વિવિધ શાળાઓની મુલાકાત લઈને ભૂલકાઓને આવકારશે.

કાર્યક્રમના પ્રથમ દિવસે ૨૩ મેના રોજ સવારે 8:00 કલાકે હાડગુડ ગુજરાતી પ્રાથમિક શાળા, સવારે 10:00 કલાકે એમ.એસ. પટેલ હાઈસ્કુલ- વડોદ અને બપોરે 12:00 કલાકે વી.જે. પટેલ પ્રેક્ટીસીંગ હાઈસ્કૂલ -આણંદ ખાતે પ્રવેશોત્સવ કાર્યક્રમમાં બાલવાટિકા, ધોરણ 1, ધોરણ 9 અને ધોરણ 11 ના વિદ્યાર્થીઓને શાળા પ્રવેશ કરાવશે.

આ શૈક્ષણિક મહોત્સવના બીજા દિવસે તા.૨૪ જૂન ના રોજ સવારે 8:00 કલાકે કરમસદની પંચવટી પ્રાથમિક શાળા, સવારે 10:00 કલાકે સી.જે. પટેલ હાઈસ્કૂલ-કરમસદ તેમજ બપોરે 12:00 કલાકે આણંદ હાઇસ્કુલમાં બાળકોને પ્રવેશ આપવામાં આવશે.

ત્યારબાદ, ૨૫ જૂન ના રોજ જોળ પ્રાથમિક શાળા, વિદ્યાનગરની એસ.ડી. દેસાઈ હાઈસ્કૂલ અને ગો. જો. શારદા મંદિર ખાતે પ્રવેશોત્સવના કાર્યક્રમો યોજાશે.