આણંદ જિલ્લામાં સતત બીજા દિવસે ફૂડ એન્ડ ડ્રગ વિભાગની યોજાઈ ખાસ ડ્રાઇવ

પ્રકાશિત તારીખ : 06/12/2025

આણંદ જિલ્લાના યાત્રાધામ/પ્રવાસન સ્થળ પરિસરમાં વેચાતા ખાદ્ય પદાર્થનું કરાયું ચેકિંગ

મહીસાગર માતાજી મંદિર, વહેરા ખાડી, વાસદ ઇસ્કોન મંદિર પરિસરની આસપાસ વેચાણ કરતા લારી ગલ્લા ઉપર ખાદ્ય પદાર્થનું કરાયું આકસ્મિક ચેકિંગ

25 પેઢીઓ પાસેથી 12 ખાદ્ય પદાર્થના નમુના લેવાયા

4 કિલો ઉપરાંત બિન આરોગ્યપ્રદ ખોરાકનો જથ્થો નાશ કરાયો

આણંદ, શુક્રવાર: આણંદ જિલ્લા કલેકટર શ્રી પ્રવીણ ચૌધરીના માર્ગદર્શન હેઠળ આણંદ જિલ્લામાં આવેલા યાત્રાધામ/ પ્રવાસન સ્થળો ખાતે વેચાણ થતા ખાદ્ય પદાર્થોના ટેસ્ટિંગ કરવા બાબતે ખોરાક અને ઔષધ નિયમન તંત્ર આણંદ દ્વારા ખાસ ઝુંબેશ હાથ ધરવામાં આવી છે જે આજે સતત બીજા દિવસે આ ડ્રાઈવ ચાલુ રાખવામાં આવી છે.

નિવાસી અધિક કલેકટર શ્રી ઋતુરાજ દેસાઈ ની દેખરેખ હેઠળ ખોરાક અને ઔષધ નિયમન તંત્ર ના ફૂડ સેફ્ટી ઓફિસર દ્વારા મહીસાગર માતાજીની ચોરી, વહેરાખાડી મંદિર પરિસરની આસપાસ ખાદ્ય પદાર્થોનું વેચાણ કરતા 11 જેટલા લારી ગલ્લાઓની એફ.એસ.એફ 2006 અન્વયે તપાસ કરી ને 02 પેઢીઓ પાસેથી પાપડીનો લોટ અને ચણા દાળના નમૂના લેવામાં આવ્યા હતા. તેવી જ રીતે મહીસાગર મંદિર વાસદ ખાતે 04 પેઢીઓની તપાસ કર્યા બાદ 01 લીટર જેટલું બળેલું તેલ,03 કિલો જેટલી વાસી પાપડી અને 500 ગ્રામ ચટણી કે જે બિન આરોગ્યપ્રદ ખાદ્ય પદાર્થ હોવાથી તેનો નાશ કરવામાં આવ્યો હતો.

આ ઉપરાંત ઇસ્કોન મંદિરની બાજુમાં 05 પેઢીઓ ખાતે તપાસ કરીને 04 જેટલા નમુના લેવામાં આવ્યા હતા અને લોટીયા ભાગોળ વિસ્તાર ખાતે 05 પેઢીઓમાં તપાસ કરીને 06 જેટલા નમુનાઓ લેવામાં આવ્યા છે.

આમ, સતત બીજા દિવસે ફૂડ એન્ડ ડ્રગ વિભાગ દ્વારા 25 જેટલી પેઢીઓ ખાતે તપાસ કરીને 12 જેટલા નમુના મેળવવામાં આવ્યા છે.

ફૂડ સેફ્ટી ઓફિસર દ્વારા આ તમામ લારી ગલ્લા તથા પેઢીઓને ખોરાક યોગ્ય અવસ્થામાં સારી હાઇજેનિક કન્ડિશનમાં રાખેલો અને શુદ્ધ સાત્વિક તથા તાજો પીરસવામાં આવે તે અંગેની સૂચનાઓ આપવામાં આવી હતી. આ ઉપરાંત આજુબાજુ યોગ્ય સાફ-સફાઈ રાખે, ગલોઝ પહેરે, કેપ પહેરે અને ફૂડ અને સેફટી ના કાયદાનું પાલન કરે તે અંગેની જાણકારી આપવામાં આવી હતી.

આમ આણંદ જિલ્લામાં આવેલ યાત્રાધામો પ્રવાસન સ્થળો ખાતે આવતા શ્રદ્ધાળુઓ પ્રવાસીઓને શુદ્ધ અને આરોગ્યપ્રદ ખોરાક મળી રહે તેને સુનિશ્ચિત કરવા માટે ખોરાક અને ઔષધ નિયમન તંત્ર દ્વારા ખાસ ઝુંબેશ હાથ ધરવામાં આવી હતી, તેમ ખોરાક અને ઔષધ નિયમન તંત્ર આણંદના ડેઝીગ્નેટેડ ઓફિસર દ્વારા જણાવવામાં આવ્યું છે.

આણંદ જિલ્લામાં સતત બીજા દિવસે ફૂડ એન્ડ ડ્રગ વિભાગની યોજાઈ ખાસ ડ્રાઇવ